ភ្នំពេញ៖ នាយករដ្ឋមន្ត្រី សម្ដេចធិបតី ហ៊ុន ម៉ាណែត បានថ្លែងថាកម្ពុជាសំខាន់បំផុតគឺត្រូវតែការពារសន្ដិភាពដែលសម្រេចបានមកដោយលំបាកឱ្យខាងតែបានទោះក្នុងតម្លៃណាក៏ដោយ ហើយអនាគតមេដឹកនាំកម្ពុជាត្រូវជៀសវាងពីការចូលរួមផែនការនយោបាយដែលជំរុញការផ្លាស់ប្ដូររបបដោយវិធីសាស្ត្រមិនប្រជាធិបតេយ្យ ហើយត្រូវតែប្រកាន់ខ្ជាប់នូវមនសិការនៃការទទួលខុសត្រូវ ក្នុងការពារសន្ដិភាពឱ្យខាងតែបាន។

ក្នុងសន្នីសីទលើកទី១ស្ដីពី អនាគតកម្ពុជាដោយគ្មានអំពើប្រល័យពូជសាសន៍ នៅសាលយុត្តិតេជោ នៃបញ្ជាការដ្ឋានកងទ័ពជើងគោក អតីតសាលាក្ដីខ្មែរក្រហមនៅព្រឹកថ្ងៃច័ន្ទ ទី២០ ខែឧសភា ឆ្នាំ២០២៤ សម្ដេចធិបតី ហ៊ុន ម៉ាណែត បានថ្លែងថា ពេលដែលប្រទេសមានសង្គ្រាមគ្មានឡើយសិទ្ធិមនុស្ និងលទ្ធិប្រជាធិបតេយ្យ ដូច្នេះគឺជាការទទួលខុសត្រូវរបស់រដ្ឋ និងប្រជាជនទាំងអស់គ្នាក្នុងការពារសន្ដិភាព និងក្នុងការឱ្យតម្លៃដល់សន្ដិភាពដែលសម្រេចបានមកជាមួយនឹងលះបង់មិនអាចកាត់ថ្លៃបាននេះ។

សម្ដេចថា៖ «មិនត្រូវភាន់ច្រលំថា សន្ដិភាព បានមកដោយឯកឯងនោះទេ»។

សម្ដេចធិបតីបន្ថែមថា តាមរយៈការរៀនសូត្រពីមេរៀនកម្ពុជា សហគមន៍អន្តរជាតិចាំបាច់ត្រូវដាក់របាំងការពារប្រឆាំងនឹងការប៉ុនប៉ងណាមួយ ដែលអាចបង្កឱ្យមានការកើតឡើងនៃសង្គ្រាមត្រជាក់សាជាថ្មី ហើយចុងក្រោយរុញច្រានឱ្យមានជម្លោះផ្អែកលើការប្រកួតប្រជែងភូមិសាស្ត្រនយោបាយ។ សម្ដេចថា ប្រទេសទាំងអស់ គួរតែធ្វើការរួមគ្នាដើម្បីរក្សាសន្ដិភាពដែលមានស្រាប់ និងស្វែងរកការសន្ទនាដោយសន្ដិវិធីដើម្បីបញ្ចប់សង្គ្រាមដែលកំពុងកើតឡើងសំដៅឱ្យបាន នូវការបាត់បង់ជីវិតជនស៊ីវិល ក្រោមទម្រង់ណាមួយនៃអំពើប្រល័យពូជសាសន៍៕